Rasyonal:
Sa mga nakaraang halalan sa Pilipinas, hindi na lamang plataporma o debate ang pangunahing larangan ng tunggalian sa politika. Sa halip, ang kulturang popular—lalo na ang musika—ay lumilitaw bilang mahalagang midyum sa paghubog ng pampublikong imahe, diskurso, at damdaming pulitikal. Sa panahong malakas ang impluwensya ng social media at viral content, kailangang maging mas mapanuri sa kung paano ginagamit ang sining, sayaw, at kanta sa pagbebenta ng ideolohiya at personalidad.
Dalawang tumampok na halimbawa ng ganitong manipestasyon ay ang Budots campaign ad ni Bong Revilla noong 2019 at ang kantang Rosas nina Nica del Rosario at Gab Pangilinan para sa kampanya ni Leni Robredo noong 2022. Ang Budots, na inangkla sa isang masiglang electronic dance trend, ay ginamit bilang isang aliw at media spectacle—isang epektibong halimbawa ng populismo na humihikayat sa emosyon kaysa kritikal na pagsusuri. Samantala, ang Rosas ay isinilang mula sa people’s campaign—isang kilusang mula sa ibaba na gumamit ng musika upang maipahayag ang paninindigan, damdamin ng pag-asa, at panawagan ng pagbabago. Sa pamamagitan ng paghahambing sa dalawang kampanyang ito, layunin ng papel na ito na tukuyin ang papel ng musika bilang kasangkapan ng magkaibang anyo ng politika: ang populismo at ang taumbayang kampanya. Higit pa rito, layunin nitong ipakita kung paanong ang musika at kulturang popular ay maaaring gamitin hindi lamang para aliwin kundi upang impluwensyahan ang pampublikong diskurso. Kaya't mahalagang pag-aralan ang mga ito sa lente ng kritikal na pagsusuri upang hindi tayo basta-bastang tinatangay ng aliw at emosyon, kundi matututo tayong suriin din ang mas malalim na kahulugan, layunin, at epekto ng kulturang popular sa ating pulitikal na kamalayan.
Layunin:
1. Masusing suriin ang paggamit ng Budots sa 2019 campaign ad ni Bong Revilla at ng kantang Rosas nina Nica del Rosario at Gab Pangilinan sa 2022 campaign ni Leni Robredo bilang mga anyo ng media spectacle at affective politics sa loob ng kulturang popular.
2. Ihambing ang dalawang kampanyang musika bilang representasyon ng populismo sa kaso ni Revilla, at ng people’s campaign bilang kilusang mula sa ibaba sa kaso ni Robredo, gamit ang lente ng critical cultural studies.
3. Tukuyin ang implikasyon ng paggamit ng musikang popular sa politika sa pagbubuo ng pampublikong opinyon, diskurso, at pagkilos, at palalimin ang pag-unawa sa kahalagahan ng pagiging mapanuri sa kulturang popular bilang kasangkapan ng ideolohiya at mobilisasyon.
Metodolohiya:
Gagamit ang pananaliksik na ito ng kwalitatibong diskursibong analisis upang suriin ang dalawang campaign materials: ang Budots campaign video ni Bong Revilla noong 2019 at ang kantang “Rosas” nina Nica del Rosario at Gab Pangilinan noong 2022. Susuriin ang kanilang nilalaman, anyo, at sirkulasyon bilang anyo ng musikang ginamit sa magkaibang uri ng kampanyang pampulitika—ang populistang kampanya at ang people’s campaign. Gagamitin bilang lente sa pagsusuri ang mga teoryang Media Spectacle ni Douglas Kellner, Populism nina Ernesto Laclau at Chantal Mouffe, at Affective Politics ni Sara Ahmed. Mangangalap ng primary sources tulad ng mismong campaign videos at musical performances, pati na rin ng secondary sources gaya ng mga artikulo, panayam, at akademikong journal. Layunin nitong matukoy kung paano ginagamit ang aliw, emosyon, at imahe sa kulturang popular upang makaapekto sa pulitikal na opinyon ng publiko. Sa kabuuan, nais ng mag-aaral na palalimin ang kamalayang kritikal sa ugnayan ng musika, politika, at kulturang popular sa panahon ng halalan.